الدليل ده بيشرح المتجر من ناحيتك إنت: تفتحه فين، تلوّنه إزاي، وليه صنف مايظهرش. والطلبات نفسها ليها شرح لوحده، والإعلانات كمان شرح لوحده.
١إيه ده ونفعه إيه
المتجر صفحة واحدة على النت فيها أصنافك بأسعارها وصورها. تحطّ رمز QR على باب المحل أو على الفاتورة، أو تبعت اللينك في واتساب — الزبون يفتحه من موبايله من غير ما ينزّل تطبيق ومن غير ما يعمل حساب.
ونفعه العملي: الزبون اللي بيرنّ ويسأل «عندك إيه النهارده؟» بقى يشوف بنفسه، واللي عايز يطلب من البيت بيبعتلك الطلب مكتوب بأصنافه وكمياته بدل رسالة صوتية تفهم منها نص الكلام.
والمتجر مش بيبيع من غيرك. الطلب اللي بيوصل بيقف مستنّي موافقتك — مافيش مخزون بينقص ولا قيد بيتكتب لحدّ ما تضغط موافق.
٢تلاقيه فين في النظام
في القايمة الجنب فيه بند اسمه المتجر الإلكتروني، وجوّاه:
| البند | بيعمل إيه |
|---|---|
| أصناف المتجر | تطلّع منه رابط متجرك ورمز QR وتنزّله صورة تطبعها |
| طلبات المتجر | الطلبات اللي جاية من الزباين، وجنبه رقم اللي مستنّي موافقتك |
| شكل المتجر | ألوان المتجر وطريقة الطلب، والبانر اللي فوق |
| إعلانات المتجر | الشرائح اللي بتظهر في صدر المتجر ووسط المنتجات |
| بوت المحل على تليجرام | قناة باسم محلّك توصلك فيها الطلبات — شرحها هنا |
| ابعت لزباينك | بثّ عرض أو رسالة لكل اللي مربوطين بالبوت |
مش شايف البند؟ «شكل المتجر» و«إعلانات المتجر» مابيظهروش غير لصاحب النشاط أو لموظّف معاه صلاحية إعدادات النشاط. و«طلبات المتجر» بيفتحه اللي معاه صلاحية إعدادات النشاط أو صلاحية إنشاء بيع — وغيره لو ضغط عليه هيتقاله مش مسموح.
٣رابط متجرك ورمز الـQR
- افتح المتجر الإلكتروني ← أصناف المتجر.
- اختار الفرع — كل فرع له رابط لوحده ويعرض بضاعة الفرع ده.
- لو حابب، غيّر لون الرمز واكتب العنوان اللي هيتكتب فوق الرمز (اسم محلّك)، وسيب علامة إظهار شعار النشاط داخل الرمز لو عايز اللوجو في نصّه.
- اضغط أنشئ الرمز — هيطلع الرمز وتحته الرابط كامل.
- اضغط تنزيل الصورة عشان تحفظ الرمز وتطبعه، أو انسخ الرابط وابعته في واتساب.
٤ليه فيه صنف مش ظاهر في المتجر
ده أكتر سؤال بيتسأل، وليه تلات أسباب بس:
| السبب | الحلّ |
|---|---|
| الصنف مالوش سعر بيع (أو سعره صفر) | حطّ له سعر بيع. الصفر عندنا معناه «لسه ماحدّدتش سعر» مش «ببلاش» — فمابيتعرضش على زبون |
| الصنف متعلّم عليه إنه مايتباعش أو موقوف | ارجع لملفّ الصنف وشغّله تاني، أو شوف شرح الخامات لو خبّيته على إنه خامة |
| الصنف مش متاح في الفرع اللي الرابط بتاعه | افتح الصنف وحدّد الفرع ده ضمن فروعه |
وقسم «الأكثر طلباً»
فوق خالص في المتجر بيظهر قسم اسمه الأكثر طلباً — بس مش هيظهر عندك غير لو عندك ٤ أصناف مباعة على الأقل في فواتير نهائية. أقل من كده القسم بيختفي خالص، وده مقصود: تلات أصناف مش ترتيب.
catalogue/<نشاطك>/<فرعك>٥شكل المتجر — الألوان وطريقة الطلب
من المتجر الإلكتروني ← شكل المتجر تختار شكل متجرك. عندك ١٤ شكل، وكل شكل بيغيّر حاجتين: الألوان، وطريقة الطلب نفسها.
وطرق الطلب تلاتة:
| طريقة الطلب | مناسبة لمين |
|---|---|
| صفحة لكل صنف | الزبون بيضغط على الصنف فتفتحله صفحته بتفاصيله وصوره ويضيف من جوّاها — للبضاعة اللي محتاجة تتفرّج عليها (هدايا، ملابس، حلويات) |
| إضافة مباشرة | صفّ لكل صنف وزرار «أضف» جنبه على طول — للزبون اللي عارف طلبه (بقالة، سوبر ماركت، مطاعم) |
| جدول كميات | الزبون بيكتب الكميات في جدول ويبعت مرة واحدة — لعميل الجملة اللي بياخد ٢٠ صنف في الطلب |
ومن الـ١٤: ٦ أشكال بصفحة لكل صنف، ٥ بإضافة مباشرة، و٣ بجدول كميات. يعني تختار اللون اللي يعجبك من جوّه الطريقة اللي تناسب بيعك.
- افتح المتجر الإلكتروني ← شكل المتجر.
- كل شكل قدّامك بمعاينة صغيّرة: فوقها اسمه، وتحتها طريقة الطلب مرسومة، وتحتها سطر بيقول مناسب لإيه.
- اضغط على الشكل — بيتحفظ فورًا وبيتغيّر عند زباينك في نفس اللحظة.
- اضغط شوف متجرك دلوقتي فوق عشان تفتحه بعينيك.
٦بانر المتجر — الجزء اللي فوق خالص
البانر أول حاجة عين الزبون بتقع عليها. من نفس شاشة شكل المتجر، فوق قسم الأشكال، تلاقي بانر المتجر بتلات اختيارات:
| الاختيار | يعني إيه |
|---|---|
| الشكل العادي | شعارك واسم محلّك وتليفونك على خلفية بلون متجرك — ومش محتاج ترفع أي صورة |
| صورتك + بياناتك فوقها | ترفع صورة محلّك ويفضل الاسم والتليفون ظاهرين عليها |
| صورتك بس | بانر إنت مصمّمه فيه كل حاجة — النظام مش هيكتب فوقه أي حرف |
- اختار الوضع اللي عايزه من التلاتة.
- لو اخترت وضع فيه صورة، اضغط صورة البانر واختار الصورة.
- اضغط حفظ البانر.
· صورة مربّعة أو طويلة هتتقصّ من فوق ومن تحت. حطّ الاسم والشعار في نصّ الصورة مش عند الأطراف.
· في وضع «صورتك بس» البانر بيطلع بنفس المقاس بالظبط. أما «صورتك + بياناتك» فبيطول شويّة عشان يسع الاسم والتليفون — سيب فراغ في النصّ.
· لو اخترت وضع صورة وما رفعتش صورة، النظام بيرجّعك للشكل العادي من غير ما يقولك إنه كسر اختيارك — عشان مايطلعش متجرك بشريط فاضي مافيهوش لا اسم ولا صورة.
store-theme٧إعدادات المتجر — تشغّل وتقفل اللي إنت عايزه
من القايمة الجنب: المتجر الإلكتروني ← إعدادات المتجر. تسعتاشر مفتاح في خمسة أقسام، كل مفتاح بيغيّر حاجة الزبون يشوفها.
| القسم | بيتحكّم في إيه |
|---|---|
| العرض والتصفّح | ترتيب البطاقة، عرض الرصيد المتاح، وشكل القايمة |
| السلّة والطلب | عدّاد الكمية، والحدّ الأدنى للطلب |
| الثقة والمعلومات | بطاقة هويتك، وسيلة التواصل، وسياسة الإرجاع |
| الإشعارات | يوصلك إيه لمّا يجيلك طلب |
| متقدّم | مفاتيح فيها تحذير — اقرا التحذير قبل ما تشغّلها |
وأي تغيير بيظهر في متجرك على طول — افتح متجرك في تبويب تاني وشوف الفرق بنفسك. والمفاتيح اللي مكتوب جنبها «قريباً» معطّلة عن قصد عشان تعرف إنها جايّة فمتدوّرش عليها في مكان تاني.
وعرض الرصيد تحديدًا: لو شغّلته الزبون هيشوف الكمية المتاحة من كل صنف. مفيد لو مخزونك مظبوط، ومضرّ لو لأ — لأن زبون شاف «متاح ٣» وطلب ٣ ومالقاش، مش هيرجع.
store-settings٨شهد تكتبلك وصف الصنف
الوصف هو اللي بيخلّي الزبون يفهم الصنف من غير ما يسألك. وفي شاشة إضافة صنف أو تعديل صنف هتلاقي صندوق فيه صورة شهد وزرّ «اكتبلي وصف».
| الخطوة | اللي بيحصل |
|---|---|
| اكتب اسم الصنف | لازم الاسم يتكتب الأول — منّه بتفهم الصنف |
| اضغط «اكتبلي وصف» | بتكتب وصف تسويقي عربي في حدود ٤٥ كلمة |
| راجع وعدّل | الوصف مابيتحفظش لوحده — بيتحطّ في الحقل وإنت تعدّله وتحفظ |
بتكلّفك نقطة واحدة من رصيد نقاط الذكاء بتاعك، والرصيد الباقي بيظهرلك بعد كل مرّة. ولو التوليد فشل مابتتخصمش النقطة.
ولو فيه وصف مكتوب قبل كده، هتسألك الأول قبل ما تستبدله — عشان ماتضيعش كلام كتبته بإيدك.
٩الزبون بيشوف إيه بالظبط
لمّا يفتح الرابط بيلاقي بالترتيب:
| الجزء | بيعمل إيه |
|---|---|
| البانر | شعارك واسمك وعنوان الفرع وتليفونه — أو صورتك زي ما اخترت |
| الإعلانات | شرائح عروضك لو ضايفها — شرحها هنا |
| خانة البحث | يكتب كلمة فتتصفّى الأصناف قدّامه على طول من غير ما تتحمّل الصفحة تاني |
| رقائق التصنيفات | شريط أفقي بأسماء تصنيفاتك، ضغطة توَدّيه لمكان التصنيف في الصفحة |
| الأصناف | بالشكل اللي اخترته: بطاقات أو صفوف أو جدول كميات |
| الشريط السفلي | أربع خانات ثابتة تحت: الرئيسية · تصفّح · السلة · طلباتي |
ولمّا يبعت الطلب
بيملا اسمه ورقم موبايله (دول الإلزاميين بس)، ويقدر يزوّد إيميله وعنوانه وملاحظات، ويختار طريقة الدفع. وفيه زرار حدّد موقعي على الخريطة — لو ضغطه ووافق، بيوصلك مع الطلب زرار بيفتح موقعه على خرايط جوجل.
١٠أسئلة سريعة
| السؤال | الإجابة |
|---|---|
| الزبون لازم يعمل حساب؟ | لأ. بيفتح ويطلب باسمه ورقمه بس — مافيش تسجيل ولا كلمة سرّ. |
| عندي أكتر من فرع | كل فرع له رابط ورمز لوحده. اطلع رمز لكل فرع من «أصناف المتجر». |
| الأسعار في المتجر بتتاخد منين؟ | من سعر بيع الصنف في النظام. غيّرته يتغيّر في المتجر على طول — ولو حدّ عدّل السعر في متصفّحه، النظام بيحسب بالسعر اللي عندنا مش بتاعه. |
| الطلب بينقص المخزون؟ | لأ إلا لما توافق. قبلها هو صفّ مستنّي، فمافيش مخزون محجوز. |
| أقدر أوقف المتجر؟ | مافيش زرار «اقفل المتجر». اللي بيتحكّم في اللي معروض هو أسعار البيع وفروع الأصناف — صنف من غير سعر مش بيظهر. |
| عايز أغيّر شكل المتجر كل موسم | عادي، غيّره وقت ما تحبّ. مافيش حدّ لعدد المرّات. |
